دقة قلب (12)

*#دقة_قلب《12》*

*#بقلم_مها_حولي_الزاكي‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏* ‏‏‏‏‏‏‏‏‏‏‏

‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏

للمره التانيه تصرف عامر زعجني شديد ، أبداً ما كان مفروض يقول لأخوي : “هي ما كانت عارفه إني الإتقدمت ليها ” ختاني في موقف بايخ و حتات ضيقه شديد ، بسبب زعلي منو انفعلت و قلت ليهو هسي قدامك و قدامو انا ما موافقه و مشيت بيتنا و أظن على كدا انا و عامر انتهينا…..انتهينا؟ هو نحنا متين بدينا لمن ننتهي؟

ما أكذب لمن هديت و روقت شويه لمت نفسي و قلت ما كان اقول ليهم ما موافقه للمره التانيه ، انا كدا قفلت كل الطرق الممكن تجمعني بـ عامر ، صح اني كنت زعلانه منو بس حبي ليهو ما نقص ، غيتو بقيت متناقضه نص جواي يقول لي العملتيهو غلط و النص التاني يقول لي دا الصح ، بقيت قاعده و متوقعه في أي لحظه يجي سراج و يسألني عن القالو ليهو عامر قبيل ، قلقت شديد و خفت و فعلاً سراج جا بس الغريبة ما سألني و ما جاب سيره لـ زول لمن حيرني ..!!

_____________________

بقيت أفكر بيني و بين نفسي كيف أخليها ترجعي لي و تعترف انها بتحبني و توافقي علي! حاولت كذا مره اتكلم معاها للمره المليون بس هي ما أدتني فرصه و دايماً بتهرب مني كأنها بتتلذذ بعذابي …

استمر الحال اسبوع و انا ما عارف اعمل شنو! في يوم كنت في شغلي قاعد و سرحان لحدي ما دخل أيمن صحبي و انا ما جايب ليهو خبر ، طقطت لي اصابعو حتى انتبهت لوجود ، قلت ليها معليش ياخ ما انتبهت ليك ، قال لي الشاغله بالك تتهنى ، ابتسمت و سكت ، قال لي مالك لي اسبوع مع على بعضك ؟

قلت ليهو ما تشغل بالك ، قال لي لا حابي اشغل بالي مالك يا مان!؟ اتكلم ممكن اساعدك ، ناسي اننا أصحاب؟

بعد سكات حكيت ليهو ضحك و قال لي بت الناس دي عذبتك والله يا صحبي ، اخيراً وقعت و ماف زول سمى عليك ، عامر الكل البنات ميتات فيهو حالياً هو الميت في وحده و هي سافهاهو 🤣🤣

قلت ليهو حتقعد تضحك كدا ولا حتساعدني؟

قال لي شوف مبدئياً كدا ما حنقدر نعمل حاجه مالم نتأكد انها بتبادلك نفس الإحساس ، لأنو الفكره الحـ اقولها ليك بتعتمد اعتماد كلي على نقطة “هي بتحبك ولا لا ”

سكت مسافه بعديها قلت ليهو ما متأكد يمكن بتحبني ، مره قالت لي لو كنت عارفه انك الإتقدمت لي ما كان رفضتك ، ضحك و قال لي ياااازول! ! اتقدمت ليها قبل كدا و ما كلمتني؟

قلت ليهو اقول شنو و انا اساساً ما كنت مخطط لحاجه حتى ناس بيتنا ما كانوا عارفين ، بس حصل لي موقف معاها خلاني انفعل و اطلب يدها من أخوها ، حتى ناس بيتنا عرفوا و في الآخر قالوا لي انها رفضت و……و….الخ

سكت مسافه بعديها قال لي ابشرك هي ذاتا بتحبك ، بعد دا ح اقدر اقول ليك تعمل شنو عشان توافق عليك و تحس انها حتخسرك

قلت ليهو بإستعجال : اتكلم ، اتكلم

قال لي الموضوع ببساطه إنك تخليها تغار عليك ، قلت ليهو كيف؟

ضرب يدو مع جبهتو و قال لي آي حاجه إلا يعلموك ليها يا عامر؟ الغيره الواااحده دي ما بتعرفها؟

قلت ليهو فهمتك بس اعمل شنو؟ قال اخخ منك البشوف شغلك و أفكارك البتقدمها فيهو ما بقول في حاجه بتغلبك بس حقيقة انت فاشل في أي حاجه بتخص البنات 🤣🙂

قلت ليهو ما تنسى انك براااك القلت حتساعدني و أصريت علي عشان أحكي ليك ، فلو الموضوع غالبك انسحب عادي، قال لي هسي انا مش ساعدتك؟ قلت ليك خليها تغيييير عليك اكتر من كدا اشرح ليك شنو؟…… قلت ليهو طيييب تمام

_________________________

من اليوم داك تاني ما اتلاقيت مع عامر و اصلاً انا الكنت بهرب منو عشان ما يحاول يتكلم معاي ، رغم الحصل هو كان بحاول يتكلم معاي بس انا ما بديهو فرصه و ما أكذب بتعجبني فكرة انو بحاول يراضيني و يتفاهم معاي ، صح زعلانه من كلامو القالو لي بس دا ما بمحي حقيقة انو كلو على بعضو كدا عاجبني ❤️

في يوم جمعة كدا أمي قالت لي ارح معاي بيت ناس إنصاف ديل نشرب معاهم الجبنه و نجي ، قلبي عمل شححح و الغريبه اني ما اعترضت و مشيت معاها، عارفه نفسي متناقضه و ما مفهومه و ذاتي ما عارفه مشيت معاها ليه ، المهم مشينا ليهم شكلهم كانوا عاملين قعدة صندوق ، مع انها مفروض تكون قعده للنسوان الكبار بس حتى بناتهم القدري و الأكبر مني بشويه جوه معاهم ، حتى سمر الفرحانه احساس انهم بقوا أهل مرت أخوهم و كدا ، من جات تشيل و ترتب و تنضف حتى هي العملت ليهم الفطور و مسكت برنامج الجبنه كلو ، و في كم بت كدا وحده كانت بتعمل كيك و التانيه بتعمل فشار و فنكوش ، بعد شويه سمر جات طالعه من المطبخ و قالت لـ خالتو إنصاف الغاز قطع ، خالتو إنصاف قالت ليها دي عوجه دي والله معناها الجبنه حتتأخر شويه ، أمي قالت ليها خلي مها تمشي تعملها لينا في البيت و تجيبها ، في وحده اسمها مريم قالت لأمي انتي مش عندك كانون كبير كدا؟ خلي بت تجيبو والله جبنة الكانون دي اسمح منها ماف ، أمي قالت ليها صح كلامك و قالت لي امشي جيبيهو، خالتو إنصاف قالت بما انو في كانون معناها ضروري يكون في بخور ، ماشه اجيبو …

المهم طلعت من مظلتهم و انا بتلفت على حوش الرجال زي الرايحه لي حاجه ، غيتو التناقض الفيني دا الله يعيني عليهو ، المهم مشيت بيتنا و جبت الكانون معاي ، أول ما دخلت كدا لقيت سمر واقفه مع عامر و كانت بتقول ليهو أمك قالت ليك تعال شيل الأنبوبه و أملاها، قال ليها تمام، كانت حتمشي بس هو قال ليها سمر!

هي الخفيفه اللفيفه طوالي جاتو جاريه و قالت ليهو بصوت كدا ايوه يا عامر ، قال ليها بعدين ما تنسي جيبي لي جبنه عليك الله، قالت ليهو ما بتوصيني والله، قال ليها ما بتقصري، هو ابتسم و هي ابتسمت ليهو و انا شميتهم الإتنين ، دخلت من غير ما أعاين ليهم نظام اني لا شفت لا سمعت حاجه و أصلاً ماف حاجه فارقه معاي و انا من جواي حاسه بطعنه جوه قلبي و مغيوظه شديد ، وديت ليهم الكانون و قعدت و انا بالي كلو معاهم ، شويه كدا لمحت سمر جايه علينا ، بس عامر وقفها ما عارفه قال ليها شنو بس هزت ليهو راسها بمعنى حاضر و الإتنين كانوا جايين على المظله، لمن وصلوا جنب الباب عامر وقف و سمر دخلت و قالت : احم ، عامر حيدخل….كل وحده صلحت توبها و فيها الصلحت طرحتها ، رغم انو موقف بسيط بس ما عارفه حبيت بسببو عامر ضعف حبي ليهو، فهمت هو قال شنو لـ سمر لمن وقفها ، تلقائياً لقيت نفسي ببتسم ، سمر أشرت ليهو عشان يدخل ، جا داخل و قال السلام عليكم من غير ما يعاين لـ وحده فيهم و على طول دخل المطبخ الكان متلصق مع المظله و فاتح جواها ، طبعاً النسوان ردوا ليهو السلام و هن متكيفات منو و سامعه البنات الشابات ديل بتهامسن و كل وحده شغاله للتانيه حلاتو والله و كلام بالشكل دا 😑😏

المهم هو دخل طلع الأنبوبه و مشى ، خالتو مريم قالت لـ خالتو إنصاف ولدك دا ما مفكر يعرس ولا شنو؟ العمر ماشي والله ، خالتو إنصاف عاينت لي و قالت ليها و هي مبتسمه والله اتقدم لـ وحده لكن رفضتو، طبعاً كلهم انخلعوا ، خالتو مريم قالت ليهم دي إلا كان ما نصيحه هسي عامر دا بترفض؟ البت دي قريبتكم ولا غريبه؟

طبعاً سمر عارفه هو اتقدم لـ منو عشان كدا قالت لـ خالتو مريم دي غبيانه ساي و يمكن ذاتو هي ما بتستاهلو عشان كدا ما اتوفقوا ، ولد زي صباح العيد بيترفض؟لكن ما مشكله يا خالتو إنصاف الحي دا ملان بنات و كل وحده اسمح من التانيه انتي بس أشري

طبعاً أمي بتعاين لي ساي نظام شفتي غباءك؟ هسي دا راجل بترفض؟

رغم انهم ما عارفين انو اتقدم لي انا (مستغربه شمار زي دا كيف ما وصلهم ) مع ذلك كنت محرجه شديد و انا بسمع في كلامهم الكان عن غباء و هبالة البت الإتقدم ليها ، ما صدقت متين غيروا الموضوع و فتحوا سيره غيرو ، المهم قعدنا و شربنا الجبنا و اتونسنا في الآخر النسوان فاتوا فبقينا بس انا و أمي لأنو خالتو إنصاف أصرت علينا نقعد شويه …بالإضافه لـ سمر العامله البيت بيتهم، لملمت عدة الجبنه و مشت تغسلها ، أمي و خالتو إنصاف و رجاء قعدوا يتونسوا و انا طلعت تلفوني و دخلت الفيس و بقيت اقلب فيهو بعد شويه ، ولد رجاء قعد يبكي ، خالتو إنصاف قالت ليها ولدك دا اظنو جعان يا بتي ، قالت ليها ما جعان يا امي هسي رضعتو، اقسم بالله فترني عديل ما ارتحت إلا لمن كان نايم و هسي صحي عاد تاني ما بسكت ، أمي قالت ليهو ولدك دا شكلو بكاي شديد ، رجاء قالت لي شديد يا خالتو والله مرات لمن بصدع من صراخو ، المهم هو قعد يبكي و هي بتحاول تسكت فيهو بس ما سكت عشان كدا قلت ليها جيبيهو أطلع بيهو بره في الحوش ، أمي قالت لي بري بري هسي توقعي الجنى ، و هو ذاتو صغير شديد ما بتحمل الهوا ولا الشمس ، خالتو إنصاف قالت لي آيي يا بت الشافع صغير ما بطلعوا بيهو برا ، رجاء قالت ليهم خلاص وحده فيكم يا ناس أمي تمسكوا مني و تسكتوا، أمي شالتو منها و حاولت تسكتو بس ما سكت ليها، قلت ليهم كلمتكم خلوني أطلع بيهو برا و هدا البشير حقو معاهو بغطيهو بيهو كويس و اصلاً ما ماشه بيهو بعيد حدي الحوش دا ، خالتو إنصاف قالت لي خلاص شيليهو ، المهم غطيتو كويس و طلعت بيهو برا في الحوش و بقيت أهز فيهو لحدي ما سكت ، في شجره جنب الباب مشيت وقفت جنبها و بقيت اشاغل فيهو لحدي ما بقى يضحك ، شويه كدا الباب انفتح و حمودي جا داخل ، قال لي القال ليك شيلي اخوي منو؟ مودياهو وين؟

قلت ليهو ما ماشه بيهو حته ، بقى يبكي و يجرني من التوب و يقول لي نزليهو ، وديهو لـ ماما ، نزليهو ياخي ، طبعاً انا شغاله ليهو عيب يا حمودي ….اقعد ساي ياخ و انا ما قادره ارفع التوب اغطي شعري و ما قادره افك حمودي مني لأني شايله اخوهو بيديني الإتنين ، فجأه عامر جا داخل ، اتخلعت و ما عرفت ارفع التوب بأي طريقه و حمودي لسه شغال يجروا لي ، عامر قال ليهو بنهره كدا حمودي! …..فك ليها التوب!

حمودي زعل عشان عامر هرشو قام بكى زياده و قال ليهو بكلم ليك ماما و جرى لـ أمو رجاء ، عامر كان شايل الأنبوبه و دخل و انا لسه متصبغه في مكاني ، بالجلاله مسكت الشافع بيد و صلحت التوب باليد التانيه ، طبعاً تاني قعد يبكي، اصلاً بكاهو دا بدا من ما حمودي قعد يبكي و يقول لي رجعيهو لـ ماما ، اتمحنت معاهو و قلت احسن ارجعو لـ أمو دا شكلو ما حيسكت ، فجأه عامر جا ولقاهو ببكي ، فقرب منو و بقى يشاغل فيهو و انا اتجمدت مكاني و ما كنت قادره اتنفس لأنو المسافه البيناتنا كانت قصيره تقريباً فاصلنا الشافع بس ، لما عامر انتبه اننا قريبين شديد و انا متوتره حتى الشافع ما قدرت امسكو كويس ، شالو مني و رجع لـ ورا ، المشكله اني لسه واقفه و ما ركزت في حتة انو شال الطفل و بعد عني ، يمكن لو ما هو ضحك و طقطق لي يدو كنت ح أحكون سرحانه كدا لأطول فتره ممكنه ، خجلت شديد منو و طوالي مشيت سريع لـ ناس أمي و انا سامعه صوت دقات قلبي شويه كدا و حسيتو حيطلع من مكانو ، رجاء قالت لي سجمي ولدي وين يا مها؟

قلت ليها مع …مـ….ولدك مع عامر ، قعدوا يعاينوا لي بإستغراب كدا ، و قبل ما زول يسألني عن الحاله الكنت فيها حمودي قال ليها ارح يا ماما و كان بجر فيها و هو ببكي، غيتو مدلع جنس دلع ، خالتو إنصاف قالت ليها انتي يا رجاء ما تقومي تشوفي حمودي دا عايز شنو، قالت ليها يا أمي حمودي دا ما عندو موضوع قال خالو هرشو و عايزني اشاكلو ليهو ، خالتو إنصاف قالت ليهو دا عامر مش، خلاص بعدين بشاكلو ليك، سمر جات و قالت لـ خالتو إنصاف عامر دا ما لقى غاز ولا شنو لأنو رجع الأنبوبه ذاتا، قالت ليها آيي والله ما لقى غاز ، قالت ليها خلاص غداكم تعالوا اعملوهو في بيتنا …..

في سري قلت بايخه و خفيفه و عايزا تتظارف بأي طريقه ، شويه كدا و سمر طلعت برا ، قلت أكيد ماشه لـ عامر ، أمي قالت لـ خالتو إنصاف نحنا ماشين بعد دا و وقفنا على حيلنا خالتو إنصاف قالت لينا عليكم الله اقعدوا شويه، امي قالت ليها عاد من قبيل قاعدين و ما انتبهنا للزمن ، خالتو إنصاف قالت ليها طيب دقيقه أوزيك طقم الحلل و الكبابي الإشتريتهم ، امي قالت ليها سمح و قالت لي انتي امشي البيت هسي بحصلك ، طبعاً لمن طلعت شفت سمر لاصقه في عامر و عامله نفسها بتشاغل في الشافع و هي عايزا الطريقه البتوصلها ليهو ، بت فقر خلاص لسه ما ناسيه انها قالت كلام عني لـ عامر عشان يشوفني وحده ما كويسه ، بالإضافه للصقتها فيهو و سكوتو الزاعجني أكتر انو حتى بعد ما عرف انها كذبت عليهو لمن قالت ليهو اني جاريه ورا سامر أخوها و عايزا اعمل مشاكل بينو و بين ريان مع ذلك لسه بتكلم معاها عادي كأنها ما عملت حاجه و مخليها تقرب منو كل القرب دا ، لمن جيت ماره بجنبهم سمر قالت لي بدري بدري مالك ماشه؟

من غير ما انتبه لكلامي قلت ليها ما بدري و ذاتو ما من عوايدنا نتأخر في بيوت الناس انتي ما راجعه بيتكم ولا شنو؟ 😏

قالت لي ايوه ما راجعه في النهايه ما قاعده من ناس اغرباء ديل اهل مرة أخوي 😘

حسيتها احرجتني شديد قدام عامر ، قلت ياريتني ما اتكلمت معاها ، طبعاً عامر عاين لي و رفع حاجبو مع ابتسامه بالجنبه كدا ، طوالي طلعت و خليتهم واقفين و انا مغيوووظه من حتة انها كانت لاصقه فيهو ، و كل ما تجيني فكرة انهم حالياً مع بعض و في نفس البيت بضايق شديد….

استمرت الأيام و كل يوم انا بشوف عامر و سمر سوا يا في الشارع أو جنب باب بيتهم و هي ما صدقت كل يوم ناطه في بيتهم ، انا عارفه سمر و حركاتها بس سبب واحد يخلي عامر يقرب منها و يهظر معاها ماف ، المزعلني شديد انو كان عامل فيها زول جادي و جاي يتقدم لي و هو شكلو شغال بالمزاج بس البتعجبو بقول ماشي يتقدم ليها و ما ح استغرب لو سمعت إنو خطب سمر 💔

دي أكتر فتره تعبت فيها نفسياً ، بالنهار بكون عاديه بس باليل البكى كلو بكملو ، مرات بلوم نفسي و بقول لو من البدايه ما استعجلتي و رفضيهو كان هسي الوضع اختلف و تاني برجع اقول لا هو اساساً ما عندو لي حاجه عشان كدا بقى ما شغال بي و بقيت ما بهمو حتى لمن يشوفني بسلم بس و ما بزيد ولا حرف و حياتو الواضح انها تمام شديد عكسي تماماً ، مرات كتيره بتمنى اقيف قدامو ابكي و أطلع القهر الجواي كلو و في الآخر اقول ليهو انك واحد كذاب و مخادع ، نفسي اقيف قصادو و ألوم و اشاكلو بس بأي حق و بأي طريقه 💔

قلت بأي طريقه لازم اتجاوزو زي ما هو عمل و أحاول انساهو ، في يوم امي رسلتني لـ وحده عايزا منها قروش أول ما طلعت كدا عربيه وقفت قصادي ، لمن ركزت مع السواق طلع دا خال لجين و هي ذاتا كانت معاهو ، ما متذكره اسمو كان منو بس اتذكرت انو لجين قبل أيام قالت لي ما فاهمه التاريخ و عايزاني اساعدها و أديها دروس خصوصيه في بيتهم حتى انها كلمت أمها بس بسبب الحصل انا رفضت و هي أصرت علي شديد و أظنها نقت في راس أمها لحدي ما جات و قالت لي بعجرفه تعالينا في البيت عشان تدرسي بتي دي و قروشك أول بأول ، بس برضو رفضت بس لجين كانت مصره شديد في الآخر قالت لي لو ما عايزا تجي بيتنا انا بجيك في بيتكم، أمها رفضت و قالت ليها مستحيل تمشي ليها هناك و هي أظنها قدرت تقنعها عشان كدا جات مع خالها، نزلوا سلموا علي و هو قال لي معليش جينا من غير ما نديك خبر بس رقمك ما معانا، قلت ليهو لا لا عادي ما مشكله، قال لي الزوله دي أصرت تجيك عشان تدرسيها و من أمبارح تنق في راس أمها ، قلت ليهو ما عندي مانع ، اتفضلوا ، قال لي مره تانيه هسي وراي شغل ، عاين لـ لجين و قال ليها لمن تخلصي اتصلي علي طيب؟ قالت ليهو طيب ، ركب و اتحرك من قدامنا و انا أول ما رفعت راسي شفت عامر شايل حمودي و جاي من الدكان ، قال لينا السلام عليكم و طوالي دخل بيتهم ، قلت لـ لجين ماشه قريب هنا انتي خشي البيت هسي بجي ، قالت لي لا لا بمشي معاك و نجي راجعين سوا ، طبعاً انا البت دي حيرتني معاها ، حتى في المدرسه طريقة تعاملها معاي اتغيرت ، الزمن كلو بقت معاي حتى في المكتب بتجيني!

المهم سقتها معاي و جينا راجعين ، طبعاً أمي لمن شافتها رفعت لي حواجبها نظام الجابها شنو! بس سلمت عليها ببشاشه و قالت ليها اتفضلي…..

لمن لجين دخلت جوه أمي قالت لي الجابها شنو؟ عايزين منك شنو كمان؟

قلت ليها ماف حاجه يا أمي كل الحاصل انو البت عايزاني أدرسها و خلاص ، قالت لي في المدرسه ديك كلها ما لقت زول غيرك؟

قلت ليها خلاص يا يمه ما فيها حاجه ، قالت لي سمح خلاص امشي ليها ما تقعد براها ، المهم مشيت ليها جوه شويه كدا أمي جابت لينا مويه و عصير و بديت أشرح ليها و افهمها لحدي ما اتصلت على خالها و هو جاها ، قدمتها لحدي الباب ، قالت لي مع السلامه و مشت لـ خالها قبل ما اقفل الباب كويس شايفه سمر خاشه بيت ناس خالتو إنصاف، قلت دي شنو البت العبيطه دي و طااااخ قفلت الباب…

*‏”إنكِ ندبة في صدري ، تجعلني في كل مرة أوشك أن اطمئن لأحدهم أتذكركِ ويأكلني الفزع.”*

————————————–

———————

*☆يتبــــــــــــــــــــــــــــــــــــــــــــع☆☆*

*بــــــــــــــيــــــــــــــــــــجــــــــــــــة*

اضغط هنا للانضمام لقروبات الواتس آب