حبيت ود البندر (2)
بقلم سجي المدني
#حبيت~ود~البندر 《2》
#بقلم~سجى~المدني
الليله زي الساعه ٨م مشيت بيت العرس عشان الخدمه اصلا ناس خدوج قريبين م بعيدين مننا! بفصلننا بيتين بس!.. وقت يكون عندنا عرس في الحله متعودين كل البنات نمشي وقت الخدمه وبدونا ننضف الخضار زي الجرجير مثلا والنسوان بنضفو الخضار الباقي! كنا قاعدين انا وسلمي وسلافه وحياة ومني ومدينه! كنا قاعدين وبنتونس!
سلافه:هي ي فطوم ناس امك قالو مشو البندر مالك م مشيتي معاهم!؟
=قعدت عشان بدور احضر عرس خدوج!
حياة:بري ي ختي كان منك أمشي طوالي وبتعذر لي خدوج بس!
مدينه:صيح كلامك والله!
سلمي:هسي ياسمين مشت و م فوتت الفرصه!
مني:بري يختي انا أكان زي خطيبا ولا بخليها تمش!
=ليه!
مني! :اولاد البندر ديل م معروفين! البخليني اخلي خطيبتي تمش شنو! بري بري!
ضحكت وقلت ليها:تتفسح حبه!
انتهينا من الشغل غسلت يدي ومشيت لي خدوج!
خدوج:فطوم!
فطوم:اها ي خدوج لازم معنوياتك تكون فل تمام! و م تشتغلي بعلي كويس!
خدوج:أمشي الاقي الليله واتكلم معاه!؟؟؟
فطوم:لا احسن م تتكلمي معاو صح قلت ليك اول إتكلمي معاهو! بس راجعته كلامي! وعرفت إنو الحاجه دي منك م صح نحن م إتربينا على الحاجه دي خدوج! بتين قاعدين نطلع من بيتنا ونلاقي الاولاد في الشارع الحركات دي عند بنات البندر بس! ي خدوج نسيتي اصولنا ونسيتي ادبنا! انا عارفاك عشان تابعتي اخت علي دي! بقيتي زيها!
خدوج قالت ببكا:غلطانه انا التابعتهم غلطانه انا غلطانه! فطوم بدور ارجع خدوج القديمه!
فطوم:خلاص م تبكي الفات مات!
رجعت بيتنا بعد إتكلمت مع خدوج! قاعده براي في البيت انا نحن برانا البيتنا مفصول من ناس حبوبه! كلهم اعمامي وعماتي ساكنين معاها!
رجعت صليت العشاء وشربت لي لبن وقفلت البيت ورقدت في الحوش!
اليوم التاني ويوم العرس والتجهيزات! وبطبيعتنا لو في عرس كل البنات بتلمو وبنقعدو ندق الدلوكه في عوضة العروس وهي تكون في نصنا! من الصباح مشيت ليها!
ولقيت بنات الحله كلهن قاعدات وبدقن في الدلوكه شكلهن جن بدري! قلت ليهن دقن ايوا يلا.. مبروك ي عروس مبروووك! ♥️
وبقينا نغني ونرقص!!
حياة:عاد عقبالي عقبالي عاد!
أثناء م حياة بتتكلم جات هديه خاشه وقالت ليها! بري عقبالي انا عقبالي انا كلكن أدعن لي وقولن ربنا يعرس لي هديه!
ضحكت وقلت انت ي هديه غايتو! م تصبري حبه! شفتي خفتك دي وسرعتك للعرس دي م بتجيب ليك عريس!
هديه:أسكتي مني انت ام لسان!
=هههههه
بعد تمينا دلوكتنا مرقت برا اساعد مع ناس خالتو سميه (ام خدوج) في رص الاكل والصواني! أثناء م ماشه اشتغل معاها قالت لي تعالي! ادتني تلفونها وقالت لي دي امك هاكي ليها! طبعا بس الناس الكبارر عندنا البشيلو التلفون!
مشيت على جنب!
=يمه!
_فطوم بتي كيفك!
=بخير يمه انت كيف!
_الحمدلله.. فطوم ي بتي الليله نحن جاين زي العصر كدي! جهزي البيت وفرشي ورتبي عشان م جاين برانا جايبنا ود عمك! قال م بخلينا نجي برانا!
=حاضر يمه!
أديت خالتو سميه التلفون وبقيت بشتغل معاهم!
تمينا رص وجو باقي البنات وبقو يوزعو الصواني للنسوان!
انا شلت صينيه جوا مع خدوج ! وناديت باقي البنات فطرنا وأنا طوالي مشيت البيت! غشيتو وفرشتو وختيت في بخور! وقلت احسن اجهز الغداء فت مره!
سويت ملاح باميه فروك! وسويت دمعه بامبي! وسويت لحمه! بعد داك مشيت إستحميت وصليت الضهر! وأثناء م بطبق في المصلايه سمعت الباب بدق مشيت فتحتوا وكانت دي استاذه نجاد! خشيت فضلتها وقالت لي:جيبي كتابك سريع م عندي زمن انا! وإن شاء الله تكون خفظتي القواعد وحليتي التمارين!
=ااي حليتهم!
مشيت منها وانا بنبز فيها كريهه خلاص اصلي م بدورها ام دقلوم!
جبت الكتاب وهي بدت تشرح لي زي الساعه ٣ طلعت وقبلي م تطلع قالت لي الشهر قرب يتم وين القروش!
=يابا قال بديهم ليك مجرد م الشهر ينتهي!
عاينت لي من فوق لي تحت وطلعت! غايتو بس الحمدلله!
____
“الخرطوم”
“البنات مع امهم في الغرفه”
ليلي:عليك الله ي امي هسي صهيب دا نصيح بلد شنو اليمشي ليها ياخ وبعدين م يمشو براهم!
سامرين:ي بت م تقلي أدبك وبعدين انت مالك ومالو خلي اليمشي!
اساور:امي انا عارفاك عايزه يمشي عشان عاجباك بت عمو حسن و عايزه يشوفها علشان كان عجبتو يعرسها! وانت اصلا دايره يعرسها!
سامرين:ااي يختي ماله فاطمه بت السرور والخاطر المجبور بت متعلمه ومؤدبه!
أساور قالت بتساءل:امي فاطمه دي بدلوعها فطوم!؟
سامرين:اااي!
أساور:ياخ امي البت دي لا متثقه لا متعلمه!
سامرين:وانت عرفتي كيف!
اساور:م مهم لكن انا وريتك عاد؛!
سامرين:تقول شفتيها! شوفيها اول واحكمي!
ليلي:نحن م عايزين لينا ااي بت قرى لاخونا!
سامرين:خلاص خلاص قومو ارحكو برا!
طلعو برا ولقو ناس حاجه السره لابسين! طلعو معاهم للبوابه ووقفو يتونسو مسافه صهيب يطلع العربيه!
ياسمين كانت واقفه على جنب مع أساور.. ياسمين:كان نفسي اقعد بس بجيكم المره الجايه!
اساور:كويس حبيبه تعالى وبتنعرف على بعض وبنتونس اكتر!
ياسمين:تسلمي!
صهيب طلع العربيه ناس حاجه السره ودعوهم وطلعو!
بقيت قاعده ومنتظره ناس يمه فجأه باب الحوش دقه!
مشيت فتحتو لقيتهم ناس يمه نطيت في رقبتها وقلت ليها يمهه!
يمه قالت لي:فطوم ي بتي!
سلمت عليهم وسلمت على ابوي! سألتهم من حبوبه قالو لي وداها صهيب بيتها!..
=وصهيب دا جاينا هنا ولا قاعد مع ناس حبوبه!
_قال بجينا بعد شويه!
ناس أمي دخلو قعدو اديتهم مويه ابوي مشى الصالون! وانا وامي بقينا قاعدين وبنتونس!
=يمه اها أجواء البندر كيف!
_بري والله م فيها حاجه ي بتي! احسن بلدنا دي منها! طول اليوم بتكوني قاعده جوا في البيت! وهواء طبيعي ساي ماف! بس هواهم الإصطناعي دا!
=هههه امي البندر أصلا كدا!
_بري يختي كان كدي احسن لي بلدي دي! اعوس كسرتي وعصيدتي! وامشي أحلب عنزتي! وهواي الطبيعي البارد دا! و ونستنا البليل! هناك من الساعه8بقفلو ي كافي البلا!
أثناء م بتونس مع امي سمعت صوت بقول السلام عليكم! الصوت دا حسيت كانو م اول مره اسمع بيه! كان حلوه وحاد وحنين في نفس الوقت! م عارفه ليه اللحظه ديك أنجزبت للصوت دا كدا ليه! حبيتو شديد! بالرغم من إني م شفت صاحب الصوت!…
بعد شويه ابوي طلع من الصالون ورد ليه السلام!
وتاني جا ياسر ود عمي! قال أعمل عصير وغداء! قلت ليه اعمل الغداء اول لأنو لو شربتو العصير تاني م بتقدرو تاكلو!
قال لي خلاص!…
=طيب شيل مويه!
_تمام..
اديتو المويه ومشى!
يمه:شن عملتي للغداء!
=باميه فريك! ودمعة بامبي! ولحمه!
إتكلمت معاها ومشيت رصيت الغداء وبعد شويه جا ياسر شالو! اتغدو جابو الصينيه! واديتهم جك العصير!
بعد طلعت من المطبخ يمة قالت أجرى ي فطوم المويه جات!
=بس يمه خرطوش المويه جنب الصالون! خلي الراجل يمشي وبمشي للمويه!
_فطوم المويه بتقطع سريع! وبعدين هو ود عمك بعمل ليك شنو وهو زاتو قاعد جوا ماشي يطلع! هسي!
=كويس!
خشيت المطبخ شلت لي تلاته جرادل! ومشيت على الماسوره! مليت الجردل الأول والتاني والتلات! وناديت لي يمه! وفجأه أثناء م بنادي طلع من الصالون ولد كدا طويل وحلو ولونو اصفر وعندولحيه زي صباح العيد! وااي! أثناء م انا مبحلقه فيه هو أتلفت على و شافني وانا كنت بدون طرحه وااي! سريع سريع جريت بي ورا الصالون! تقريبا قعدت وراه ١٠ دقائق! تاني م سمعت حركه طوالي طلعت لقيتو ماف! حتى لقيت الجرادل المليتهم ماف مشيت الراكوبه! لقيت يمه ويابا!
_كنتي وين ي فطوم
=يمه ااا مشيت الحمام! الجرادل وين! شلتيهم!؟؟؟
_ااي شلتهم
=طيب
____
صهيب:-
كنت مع ناس عمي حسن! بعد اخدت ونستني! استئذنت منهم وقلت ليهم ماشي بيت ناس حبوبه وبنوم معاهم الليله! أثناء م طالع لفت راسي بيمين الصالون وشفت فاطمه! ااي ااي شفتها واخيرا شفتها! كنت منتظر كل السنين دي عشان اشوفها! وأصلا جيت هنا عشان اتكلم معاها واشوف ملامح وشها المدوخاني! انتو عارفين انا بحب فاطمه من وهي في الفراشه! حب غريب صاح! كنت دايما بشيلها و م برضى زول يشيلها غيري! لو عايز زول يسلم عليها ساي! انا بغضب! انا كنت بجي البلد كتير! بس عشان اشوفها! تقريبا آخر مره شفتها كان عمرها ١١ سنه! وبعدها تاني م شفتها لأنو إضطريت اسافر برا! م إتوقعتها تحلي قدر دا اايوا هي حلوه وشديد! بس م إتوقعتها تحلى للدرجه دي! انا م عارف كيف قلبي إتعلق في شافعه صغيره كدا! مع إنو فرق العمر بينا م كتير يمكن ٦ ٧ سنه! بس بحبها! انا كنت بحسب الثواني والدقائق وكنت بحسب الايام عشان ارجع السودان واشوفها! إتوقعت إنها تجي يوم الكرامه بس م جات! بس شوقي ليها كان كفيل بي إنو يجيبني البلد♥️ِ
بحبها♥️ِ
____
فاطمه:-
زي الساعه ٩ مساء كنت قاعده في نص السرير ومربعه رجليني! وبحاول ازكر في ملامح الولد داك الإسمو صهيب الهو ولد عمي ! وإنو انا شفتو قبل كدا ولا لا! لا متأكده انا شفتو بس وين ياخ بس وين!
فجأه إذكرت إنو صهيب دا كان بجينا هنا وجياتو كانت كتيره! بس اخخ الولد الإسمو صهيب دا حلو شديد ياريتو راجلي ي يمه! ♥️ِ
راجل زي صباح العيد واحلى من صباح العيد! ♥️ِ
•
