رواية حبيت ود البندر
بقلم سجي المدني
#حبيت~ود~البندر 《01》
#بقلم~سجى~المدني
زي الساعه١ونص ظهر ولعت كانوني المتواضع وسويت الجبنه! ختيت الصينيه قدام يمه ويابا! وختيت فيهم فنجانين ولعت مبخري الصعنوني! وختيت فيه البخور الريحتو سمحه داك! بعد الجبنه تمت كبيت لي ناس يمه!
يابا:اها ي حليمه شن قلنا نمشي!؟
يمه:والله إنت سيد الرأي! وبعدين اخوك قال ليك تعال! معقوله م تمش ليه! لكن برضو الرأي رايك !
يابا!:والله م بدور ازعل اخوي! نمش احسن
=يمه انا قلت ليك بدور امش معاكم!
يمه:انت نسيتي عرس ناس خدوج صحبتك! مش قالت ليك تجيها!
=يمه بس انا ماشه معاكم البندر وبدور احضر الكرامه معاكم!
يابا:اسمعي الكلام المره الجايه بنوديك البندر!
نزلت راسي وبقيت بهب في النار! ناس يمه ماشين البندر لي ناس عمي! ولدو جا من العمره! وانا ولدو دا لاشفتو لا حصل إتكلمت معاه! وقالو هو اصلا كان برا! بعد تميت الجبنه لفحت توبي! وطلعت لي ناس خدوج!
لقيتها قاعده في الغرفه! وظاهر إنها متوتره!
مشيت عليها وقلت ليها:مالك ي بنيه متوتره كدا!شن في!؟ شن بتدوري!؟
خدوج:م بدور شئ ي فطوم بس متوتره عشان عرسي بعد بكره!
فطوم!:توتر شنو ي خدوج انت مفروض تكوني مبسوطه م شفتي هديه! ليل ونهار تتمني في العرس!
خدوج:ههههه ضحكتيني ي فطوم! ناس امك مسافرين البندر بتين!؟
فطوم:مسافرين بكره ي خدوج قلت ماشه معاهم بس قعدت عشان احضر عرسك!
أثناء م بنتكلم جات خالتها خاشه وسمعت كلامي قالت لي:كان أخير ليك تمشي تجيبي ليك عريس من البندر يشيلك فوق رأسه ويحبك ويوديك مطاعم الخرطوم ويفسحك! ويأكلك البزه ولا بقولو ليها شنو!
خدوح:البيتزا ي خالتي
خالتو عشه:ااي دي! قالو طعمها سمح أمشي عشان تجيبي لينا نضوقها!
فطوم! :بري هي.. ملاح ويكتنا وكسرتنا ديل اسمح منهن ماف انا م بدور البزه والحاجات دي
خالتو عشه:جيبيهن لينا نحن بنكلهن خليك انتي!
فطوم:خلاص انت كان بدوري تاكلي البزه ولا البيتزه دي عرسي ليك انت واحد من البندر!
خالتو عشه! :هي أسكتي السر راجلي اكان سمعك بقطع راسك دا أسكتي!
قالت كلامها وطلعت وانا وخدوج بقينا نضحك! إتونست معاها وطلعت لمن طلعت لقيت هديه جايه بيت العرس قلت ليها هديه البايره البتدور تعرس! 😂
هديه:والله ي فطوم انا أكان قمت عليك بكسر راسك دا! أسكتي وزحي من قدامي!
ضحكت وطلعت ليها لساني وطلعت!هديه أكبر بايره في حلتنا ونحن العندنا الببقي عمرها٢٠ سنه معناته دي بايره! خدوج صحبتي دي هسي عمرها ١٦ سنه وانا عمري ١٤♥️
مشيت بيت ناس حبوبه بعد طلعت من بيت ناس خدوج لقيتها بترش فيي الحوش! قلت ليها يمه!
قبلت على وقالت فطين بتي!
مشيت سلمت عليها وقلت ليها:ماشه البندر مع ناس يمه!.؟
يمه:ايا ي بتي ماشه معاهم! انت م ماشه!؟
=لا بدور اقعد احضر عرس خدوج
بعد إتكلمت مع حبوبه ورشيت ليها الحوش!
ياسمين جات ياسمين دي بت عمي بت مايعه وعامله نفسها زي بنات البندر! بتفك شعرها وبتخت الشئ الأحمر الإسمو روج دا كان جابو لي خدوج في شيلتها و عرفتو! عمو صالح ابو ياسمين ماف لو كان في اكان كسر راسها! بس هي بتفك شعرها وبتعمل الحاجات دي جوه البيت لو برا! ابويا كان ضبحها!
جات قعدت في السرير وهي شايله تلفونها ومركبه سماعاتها التلفون جابو ليها خطيبها لو م مخطوبه! اكان كسرو رقبتها وم كان شالت تلفون! يمه قالت ليها ياسمين ي بت أمشي مع فطين دي احلبي العنزه!
ياسمين م ردت اظنو م سامعاها! حبوبه قامت من السرير ومشت عليها قلعت السماعات من اضانها وقالت ياسمين ي بنيه م ساماعاني شن بقول!
_قولتي إيه!
حبوبه:انا م قلت م تتكلمي معاي زي دا إيه و شن م بعرف !
طبعا ياسمين عشان عندها التلفون متثقفه شديد ومتعلمه عدد من اللهجات!
_اها شنو ي حبوبه!
حبوبه:أمشي مع فطين دي احلبو العنزه!
_حبوبه انت عارفاني انا الحاجات ديل م بحبهم!
أثناء م بتكلم جا خاشي ود عمي الكبير إلى هو اخوها إسمو ياسر! قال ليها بهرشه انا مش قلت ليك تسمعي كلام حبوبه وااي شئ يقولو ليك تعملي انا هسي بشيل التلفون دا وبكسرو في رأسك الكبير دا!
هي نزلت رأسها وقالت لي حبوبه جيبي البسله!
انا عجبني ليها عجب! عشان متخلفه وشايفه نفسها!لبست عبايتها وطلعنا بتقول م بتحب تلبس التياب! وصلنا زريبة البهايم هي طوالي ادتني البسله وقالت لي احلبيه انت لاني الحاجات دي بقرف منها شديد! شلتها منها وقلت دا شغلنا وبنعرف ليه والحمدلله ااي شئ بنعملو و م بنقول بنقرف! لأننا متعلمين! وم عايشين حاجه نحن م قدرها! هي إتغاظت شديد المتخلفه! وقالت لي بكره بمشي البندر وبعرس ود عمو حامد الجا من العمره وبقعد معاه في البندر انت اقعدي لي لي الحواشه وحلب الغنم وشد الملحات!
اللحظه ديك فتحت عويناتي كبار وقلت ليها:ومجاهد ود عمتو حواء! مجاهد خطيبك! مش انت مخطوبه تعرسي كيف تاني!
_انا شن بدور بمجاهد دا زول متخلف ساي وقايلني بحبو! بس انا بعمل بيه شنو يختي!
قلت في سري كر عليك ي مجاهد كر علي قروشك البتصرفها عليها كر علي قلبك البحبها كر عليك!
حلبت العنزه ورجعنا البيت ودعت ناس حبوبه ومشيت بيتنا!
يابا:مشيتي وين ي فطين إتاخرتي كدا!
=مشيت ناس خديجه وغشيت حبوبه ي يابا!
يمه! :خلاص تعاالي غسلي جلاليب ابوك ديل!
مشيت طلعت الجلالبيب من الحمام وبديت اغسل!
____
في مكان أخر!
عمو حامد:ي بنات بكره جاينناو اهلكم كونو مأدبين و م تقصرو منهم!
ليلي:وااي ي ابوي الناس ديل مقرفين شديد وانا م بحبهم عزمتهم ليه هسي!
صهيب قال بهرشه:ي بت ديل أهلك اوعه تاني اسمعك تقولي كدا!
سامرين:عاد أهلك نشيلهم في راسنا و م بنقصر منهم والله!
أساور:وااي ي امي انا م ح احضر الكرامه شكلي!
صهيب:ااااساااوو!
اساور:خلاص خلاص ي صهيب عارفاك بتحب أهلك ديل!
عمو حامد:ي بت وديل برضو أهلك م بيعني عشان نحن ساكنين في الخرطوم وهم في البلد معناته م نحترمهم شفتو يوم بكره دا يجي واسمع عملتو حاجه غلط تشوفو مني كلام تاني!
#حُبنا_هو_الذي_سيجمعنا_حتي_وإن_اختلفت_بيأتنا
الليله من الصباح ناس أمي شربو الشاي ولبسو وطلعو على البندر! ومعاهم حبوبه وياسمين! اصلا لو م مشت بتعمل ااي حاجه عشان يسوقوها!
بعد هم مشو مشيت فتحت التلفزيون وبديت احضر! زهجت قفلت التلفزيون وطلعت برا! لقيت الواطه بقت سوداء والتراب والهواء شديد والمطره خلاص بتدور تصب! طلعت سريع دخلت المراتب جوا العوضه! ومشيت عايزه اقفل المطبخ المطره صبت قلت اصلا كل البيت بنقط إلا المطبخ! ف قعدت فيه! ختيت البنبر تحت الشباك وركبت فيه اصلا مطبخنا على الشارع قلت اكشف حبه المهم مديت راسي بي برا! لقيت خدوج واقفه مع على ود جيرانهم! وب علينا دا شنو دا! كانت بتتكلم معاه وبتضحك وم سمعت منهم ااي حاجه إلا هي بتضحك بس تاني سمعت وسمعتو لمن هو قال ليها م ح اخليك تعرسي غيري! هي قالت ليه اصلا! الولد دا هو من البندر جا قبل اربعه شهور! عشان عندو أهل هنا! بتين خدوج حبتو وهو حباها! ها ي خدوج عرسك بكره دا شنو البتسويه دا! معروف اولاد البندر ديل غشاشين! وبغشو البنات وبكسرو قلوبهم! وبزعلوهم لمن دموعهم يجرو! نزلت راسي وانا ببلع في ريقي قلت إلا اتكلم مع خدوج دي! والله ابوها كان عرفها والله بكتلها عديل!..
والعجب راجلها ناصر! وااي دا بقطعها حته حته وبكشحها للكلاب! واااي وكر عليك ي خدوج انا لازم انقذك من الورطه دي!
نزلت ومشيت مرقت راسي بي باب المطبخ والمطره خفت حبه بس لسه صابه! عاينت لقيت في مرتبه نسيت ادخلها! طلعت سريع دخلتها وتاني رجعت بس بليت نفسي شديدد وغياري! وشعري كلو اتبلى! بعد المطره وقفت مشيت غيرت ونشفت شعري!
وقعدت في السرير وجبت كتاب الرياضيات وبديت اشرح لي نفسي عشان استاذه نجاد بكره م تكتلنا! انا م بقرا في مدرسه بس ابوي بجيب لي اساتذه في البيت بدرسوني!! أثناء م بدرس جا ياسر ود عمو صالح! شلت طرحتي الكانت جنبي وغطيت بيها راسي سريع سريع! قال لي فطوم سوى لينا بعدين فطور متواضع عشان جايني اصحابي!
=كويس!♥️ُ
طلع مني وانا بديت افكر اعمل شنو! فكرت وقلت أعمل دمعه وملاح لوبه بي عصيده! وشعيريه!
دخلت كراساتي وكتابي الدولاب!
ومشيت المطبخ! طبخت كل شئ! وغتغتهم!
وقلت في سري الليله لو م إتكلمت مع خدوج م برتاح!
وقت الفطور جا وأصحاب ياسر جو! رصيت الفطور وياسر جا شالو ومشو الديوان انا مشيت العوضه! سمعتهم بياكلوا واحد قال الله الملاح حلو ي ياسر اختك طباخه إلا اعرسها!
كان صوتهم عالي انا لمن سعمتو قال كدا لويت خشمي وقلت! أم وش اعرس ليك شنو كمان شن بدور بيك! كبير قدر دا!
بعد كملو فطور وياسر جاب الصينيه سويت ليهم الشاي شربو وإتونسو وطلعو فاتو غسلت العده و لفحت توبي ومشيت لي خدوج!
مشيت لقيتها في العوضه وبتبكي مشيت ليها سريع وقلت ليها خدوج مالك بتبكي؟!
رفعت رويسها وقالت انا م بحب ناصر ي فطوم انا بحب علي! فطوم شن اعمل انا! ابوي لو عرفني بكسر راسي! وتاني م بخليني اعرس حتى ناصر م بعرسو لي! شن اعمل ي فطوم!
=اقول ليك النصيحه ي خدوج الكلام البتعملي فيه دا غلط وقبيل شفتك مع على وقت المطره داك!
خدوج فتحت عويناته كبار وبلعت ريقها وقالت اوعه تكلمي زول!
=انام بكلم زول بالعكس أنا بسترك لكن بشرط تخلي البتعملو فيو دا! وانت عارفه رجالنا ديمه كلمتهم بتمشي ولو عرفو بالعملتي وإنك م دايره ناصر ! تاني عرس م بخلوك تعرسي احسن ليك أرضى بالمكتوب!
_صيح كلامك ي فطوم انا الا اقول لي علي! م بعرسك! ودا المكتوب
=كلامك صيح ي خدوج
إتكلمت معاها والحمدلله الرضت لأنها لو م رضت كانت ح تدخل في مشكله! رجعت البيت زي الساعه ١خشيت إستحميت وصليت! وفتحت المصحف عشان احفظ السور الادتناا ليهم استاذه علويه!
____
“الخرطوم”
_إتفضلو إتفضلو ي اخوي الدار داركم إتفضلو!
ناس حليمهه خشو جوا للنسوان وناس حسن والرجال الباقين قعدو مع حامد!
“في محل النسوان”
سامرين:جيبي عصير ي أساور!
أساور كانت قاعد في الكرسي ومشغوله بالتلفون ولا شغاله بي أهلها وكذالك ليلى!
سامرين طقت بتها بيدها وقالت ليها قومي جيبي عصير!
أساور قامت بآخر نفس عشان تسوي العصير! ياسمين طوالي مشت لحقتها وقالت ليها أساور!أساور عاينت ليها من فوق لتحت وقالت ليها ايوه! قال ليها هي ي أساور انا يختي م زي بنات البلد مقرفه! ولساني م عديل! انا زي بنات الخرطوم! يختي نضيفه وظريفه وحتى عندي تلفون! ومتثقفه الحمدلله!
_جاده!
=وليه م اكون جاده!
_انت بتنفعي معانا معناه!
=انا ااي زول بنفع معاه انت قايلاني زي فطوم بت عمو حسن! متخلفه و م بتعرف التثقف!
_وفطوم دي منو كمان!
=احسن م تعرفيها!
“ناس سامرين”
_كيكفم ي جماعه إن شاء الله كويسين
حليمه:بخير والله الحمدلله إنتو كيف!
_والله الحمدلله!
حبوبه! :صهيب قال جا كيف ي بتي م لاقيتو!؟
_كويس والله الحمدلله… صحي ي حليمه وين فاطمه م جات معاكم!
=والله فطوم دي عندها عرس صحبتها وكانت بتدور تجي لكن م بتقدر تخلي صحبتها براها!
_المره الجايه جيبوها معاكم!
=ااي إن شاء الله!
حبوبه:ليلي ي بتي عاد شغلتكم التلفونات دا وبقيتو م بتسألو من أهلكم!
ليلي صلحت قعدتها وقالت برفعة حاجب واخر نفس برضو:م كدا ي السره لكن المدرسه شاغلانه والله!
حبوبه السره فتحت عيونها كبار وقالت:أجي كيفن تقولي السره بس! انا هناك في البلد عاد لازم يسبق إسمي دا يمه كيفن تقولي لي السره إن شاء الله قوليp حبوبه! عاد ي بنات البندر!
سامرين عاينت لي بتها وفتحت ليها عيونها كبار بتحزير وقالت ليها بصوت منخفض قولي ليها أسفه ي حبوبه!
ليلي مع إنو م كانت عايزه تقول بس إضطرت وقالت ليها أسفه ي حبوبه! “
حبوبه السره قالت ليها م مشكله لكن إتعلمي من هسي ي بتي!
أساور جات جابت العصير ومعاها ياسمين ادتهم بعد شويه جا صهيب! سلم على ناس حبوبه السره وقال لي ليلي تجيب جك عصير وكبابي! وهو بدأ يتونس معاهم وطول القعده ياسمين تعاين ليه وقربت تاكلو هو لمن إستغرب ! ليلي جابت ليه العصير شالو ومشى!
الكرامه كانت غداء الناس بقت تجهز من الساعه ٢الضيوف بدو يجو وتقريبا كانو كتاار شديد خصوصا إنو هم عندهم معارف كتار! كلهم إتعرفو على ناس البلد وبدو يتونسو معاهم وحبوهم شديد! بس ناس أساور وليلي إستغربو فيهم! كيف يحبو ناس زي ديل! الكرامه إنتهت! وصهيب نهائي م سلم من نظرات ياسمين الكانت عايزه تاكلو
••••••••••••••••••••••••••••••••••••••••••••••••••••••••
