المسؤولية (3)
بقلم حتة أمل
#المسؤوليه 《03》
#بقلم~حتة~امل
عمرو وصل البيت لقي امه و ابوهو صاحين
حسين( ابوه) : حمد لله على السلامة اها ان شاء الله عمك قاسم كويس( ابوهو شغال في مجال الاسبيرات وبعرف الموظفين لانه في تعامل في الشغل وعمرو اتصل كلمهم انه في المستشفي مع القاسم )
عمرو : الحمد لله يا ابوي لكن الدكتور قال لازم عمليه لانه قلبه تعبان
سميه: طيب يا ولدي ما يعملها
عمرو : خايف على بتو لانه ما عندو غيرها منتظرها تخلص امتحانات
سميه : لا حول ولا قوة إلا بالله يا ولدي اخت ليك العشاء
عمرو : لا لا يا امي انا عاوز اتكلم معاكم في موضوع
حسين : موضوع شنو النص الليل
عمرو: انا كلمتكم قبيل انه عاوز افاتح عم القاسم في اني طالب بتو ومستعد انتظرها
سميه : ايوا يا ولدي حصل شنو
عمرو حكي ليهم الحاصل كلو
سميه كانت دموعها نازله وقالت: الله يازاهم مالهم علي البنيه قلبي وجعني قبل اعرفها
حسين : اها والبحصل شنو
عمرو : اتفقنا انه ننتظرها تمتحن عشان ما تتلخم
انا حاسي بالمسؤوليه تجاها ومستعد اقتل ولد خالها دا لو قرب منها
حسين : يا ولدي ما تتهور اتوكل على الله ونحن معاك
سميه : بكره بعد اختك تجي من المدرسه بسوقها وامشي ليهم هم نفس العمر عشان زاتو تتعود علينا
حسين : كلام امك صاح وشيلو معاكم فواكه
عمرو : انا جبت ليهم هسي معاي شيلو شي تاني والسواق بكره بوصلكم
الصباح جا وكان القاسم ماخد اجازه يومين
اسراء : صباح الخير اصبحت كيف
القاسم: بخيييييييير طول ما انتي بخير
اسراء : الله يخليك لي يا ابوي سلمت في راسه وقالت ليهو الشاي جاهز ارح نشرب في الحوش الجو حلو برا
القاسم : بتتاخر علي المدرسه
اسراء : لا لا نشرب سريع وبجري اجهز
شربو الشاي وصلها المدرسه و وصاها ذي كل اب وكلمها انه السواق بجي يسوقها من مكتب المديره بعد تخلص لانه راجع يرتاح
دخلت الفصل وهو دخل المكتب وصي المديره ومرق
ريم : سروووو جات مالك يابت عيونك واقعه كدا
نهله : صباح الخير انا جييييييييت في شنو يا سرو عيونك مالها
اسراء : ماف شي بس كان معانا ضيوف شكلو ارهاق
نهله : طيب مالك ما كلمتيني كان قعدت معاك وخليت ناس امي يمشو لي حبوبه
اسراء : ما كنا عارفين جونا فجأة
قطع كلامهم الجرس مشو الطابور وعدا اليوم وذي كل يوم اسراء بتطلع طوالي بعد آخر حصه طوالي قالت لي نهله ارح
نهله : انا عندي حصه مع استاذة الرياضيات امشي انتي
اسراء مشت مكتب المديره ولقت السواق قاعد منتظرها واتحركو علي البيت
فتحت الباب سلمت على ابوها ودخلت استحمت ومشت علي المطبخ جهزت الغداء وكان محشي لانه ابوها بحبه وكان هو زاتو بساعد فيها وكلمها انه ام عمرو واختو جايين يحمدو ليهم السلامه
إسراء: هم مالهم فجأة بقو يجونا
القاسم : يابتي اكيد عمرو حكي ليهم وهم ناس طيبين انا بعرف ابوهو زول طيب شديد وبعدين الزول مفروض يفرح لمن يجوهو ضيوف لانه الضيف بجيب معاهو الخير
اسراء : انا والله يا ابوي بحب الضيوف بس مستغربه لانه ما بنعرفهم
القاسم: عارفك يا بتي طيب زي امك الله يرحمها وكمان شاطره في شغل البيت زيها الله يرحمها ويغفر ليها
اسراء : اللهم آمين يارب العالمين
المحشي خلاص جهز انا ح اعمل حلا وسلطات مسافة يصلو انت امشي ارتاح
اسراء خلصت ومشت تستحمي وتغير وبعد شويه الباب دق كانو سميه ورونق بتها القاسم دخلهم في الهول ومشي ينادي اسراء.
القاسم : دق الباب ودخل لي اسراء قال ليها الضيوف جو
اسراء : كان استحمت ولبست جيب شورت واسع وتيشرت
مرقت تسلم وسميه انبهرت بي جمالها وروقتها وبقت تقول ليها ماشاء الله تبارك الله ربنا يحفظك سلمت عليهم وخلت تجيب المويه والعصير
رونق : ماشاء الله يا امي البت جميله شديد انتي بتعرفيهم ؟؟
سميه : ( ما كلموها بموضوع عمرو ) لا يا بتي بس ابوها صاحب ابوك وشغال مع عمرو
رونق : انا حبيتها شديد
دخلت اسراء وقدمت ليهم العصير وقعدو يتونسو
رونق : صحي انتي ممتحنه شهاده السنه الجايه
اسراء : ايوا وانتي
رونق : انا كمان اها علمي ولا ادبي زينا
اسراء: علمي ان شاء الله انا نفسي اقرا طب
سميه : ماشاء الله يا بتي ربنا يوفقك
قامت اسراء تخت الغداء ودخلت معاها رونق وسميه وكانت سميه جايبه غداء فراخ وفطاير حلوه
سميه : ماشاء الله المحشي شكلو ظابط منو العملو ليك يابتي
اسراء: عملتو انا يا خالتي
سميه : بقت تقول ماشاء الله تبارك الله ربنا يحفظك وفي سرها بقت تقول الله بريدك يا ولدي عشان انت طيب الله رزقك بيها
ختو الغداء صينيتين وحده للرجال لانه عمرو وابوهو جايين برضو طلعو الصواني في الهول وجا عمرو شاله ومشي الصالون
عمرو : يا عم القاسم المره الفاتت اقتنعت انه اسراء هي عامله الكيك بس ما تقول لي هي كمان عملت الغداء
القاسم : والله يا ولدي هي عملت المحشي والسلطات والحلا انا كنت بساعدها بس بي اني اناولها شي او اقطع معاها حاحه
حسين: ماشاء الله تبارك الله الصلاه علي النبي
اتغدو وجابو ليهم الحلا ولسه عمرو واهله مبهورين في اسراء وبعدها شربو الشاي والقهوه ودخلو إسراء ورونق يغسلو العده ويرتبو المطبخ وسميه مشت الصالون عشان يتناقشو مع القاسم بعيدا عن اسراء و رونق
القاسم : والله شرفتونا
حسين: والله نحن لينا الشرف بي معرفتكم
سميه : ماشاء الله عرفت تربي ربنا يحفظها
لو تسمح لينا ح نجي كل مره عشان اسراء تتعرف علينا وشايفاهم هي و رونق اتعودو علي بعض سريع وان شاء الله اكون ليها زي امها واشيلها في عيوني وعمرو دا مش ولدي ما ح اسمح ليهو في يوم يزعلها
عمرو : وانا يا عمي عمري ما بزعلها واكون ليها اخوها وراجلها وسندها
حسين : ان شاء الله يا قاسم يا اخوي ربنا يتم عافيتك وتفرح بيها
القاسم دموعه كانت نازله وحاسي بالطمأنينه علي بته ويادوب ممكن يفكر يعمل العمليه
كملو ونستهم واسراء ورونق خلصو من ترتيب المطبخ واسراء مشت لبست طرحه كبيره وساتره وجو قعدو معاهم في الصالون
حسين : ماشاء الله يا بتي عليك اكل حلو زيك
عمرو: بقي يكح وقرب من ابوهو شنو يا حاج بتتغزل فيها قدامي
حسين : هههههههههههه حاضر سكتنا
اسراء: تسلم ياعمي حلو زوقك
حسين : منو علمك كدا
اسراء: خالتو سعديه جارتنا كانت بتعلمنا انا ونهله بتها وانا اصلا بحب شغل المطبخ
سميه : شكلها مرا طيبه نفسي اتعرف عليها المره الجايه بجيكم يوم سبت اقيل معاك ونتعرف عليها
اسراء : ان شاء الله
دا كلو وهي بتتكلم بي هدوء ودا المخلي عمرو اعجابه بيها يزبد
رونق : اكيييييييد انا ح اجي معاك عشان اتعرف على نهله 😁
سميه : شكلي ح اجيبك كورسات لي سعديه 🤣🤣🤣🤣 ضحكو كلهم و ودعوهم وطلعو
اسراء: تعرف يا ابوي انا حبيت خالتو سميه شديد وبالجد مبسوطه انهم جونا
القاسم كان مبسوط انه كدا بقي متطمن علي بته وراجي الامتحانات تخلص عشان يعمل العمليه
مرت الايام واسراء مجتهده في قرايتها وسميه بقت تجيها مره مره هي و رونق ومرات تمشي ليهم هي وابوها وعلاقتهم الاسريه قوت شديد
نهله : صباح الخير
اسراء: صباح الورد
نهله: عاوزه اسالك رونق خبرها شنو مع القرايه
اسراء : كويسه المجنون
ه مصره يحولوها معانا ههههههههه
نهله : ياريييييييييييت
الجرس دق ومشو الطابور وبعدها دخلو الحصص
