دقة قلب الفصل التاسع

*#دقة_قلب《09》*

*#بقلم_مها_حولي_الزاكي‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏* ‏‏‏‏‏‏‏‏‏‏‏

 ‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏

سمر بعد ما قالت كلامها دا مشت و خلتني محتار في أمري ، عقلي بقول لي صدق الكلام القالتو و قلبي بقول لي لا ، بس كل المؤشرات ضدها! لو بالجد هي ما عندها حاجه لـ سامر ، ليه بتكون متواجده في بيتهم 24 ساعه؟ ليه لمن عرفت انو ريان فهمتها غلط ما جات وضحت ليها سوء التفاهم؟ ليه لمن سامر قال ليها اتكلمي مع ريان و افهمي لي منها الحاصل ما جات لـ ريان و وصلت ليها الكلام القالو ليها سامر؟

ببساطه لأنها ما عايزا سوء التفاهم دا يوضح ، ما عايزا سامر يتقدم أي خطوه جاده اتجاه ريان ؟معقوله تكون بتحبو؟

ايوه أكيد أصلاً ماف تفسير غير دا بس ياريت ما استخدمت الطريقه دي لأنها ما بتليق بيها و أبداً ما كنت متوقع منها تصرف زي دا !

______________

من جانب آخر :

سمر رجعت بيتهم و مشت لـ سامر أخوها ، قال ليها اها بشري اتكلمتي مع ريان؟

قالت ليهو ايوه اتكلمت معاها و وضحت ليها سوء التفاهم الحصل بينكم ، بس يا سامر لازم تعرف انو مها هي السبب في دا كلو

_ ما فهمت كيف يعنى هي السبب ؟

= عديل كدا يا سامر هي من البدايه كانت عايزا تعمل مشاكل بيناتكم، يمكن غيره منها ما متأكده بس هي السبب في دا كلو قصداً دخلت الشك في ريان و هي قاصده تفهمها انو في شي بيناتكم عشان كدا ما حاولت تبرر لـ ريان و ما كانت عايزا سوء التفاهم دا يتلاشى ، انت مش طلبت منها تتكلم ليك مع ريان؟ و هي رفضت بحجة انهم متخاصمين بس في الحقيقه هي رفضت لأنها ما عايزا الإتخرب يتصلح

_ و انتي عرفتي من وين اني طلبت منها تتكلم لي مع ريان؟

= سمعتها بتتكلم مع ياسمين و تاني سمعتك بتتكلم معاها لمن كنتوا واقفين جنب الباب و كلامها القالتو ليك كذب لكن بطريقه صحيحه

_ بتقولي في شنو انتي يا سمر ، لا لا مها ما بتعمل كدا و بعدين حتستفيد شنو؟ عليك الله ما تقعدي تألفي لي قصص من راسك

= لكن يا سامر هي….

_ سمر! !….ما عايز اسمع حاجه بخصوص الموضوع دا، المهم عندي انو سوء التفاهم بيني و بين ريان يزول بس ما يكون قلتي ليها نفس الكلام القلتيهو لي؟

= اصلاً هي القالت لي ، شكلها ياداب كشفت مها، هي في البدايه كانت مفتكره انكم الإتنين خنتوها مع بعض لكن في الآخر اكتشفت انو الحصل كلو كان بسبب مها و انت ما ليك علاقه

_ ريان قالت كدا؟

= آيي والله

_ كويس بس والله يا سمر اكتشف انو ليك دخل في الكلام دا بأي شكل من الأشكال والله إلا اعلقك في المروحه دي!

______________________

من جانبي انا بقيت محتاره و ما عارفه اعمل شنو و ياسمين بقت ما بتتكلم معاي عشان ما لبيت ليها طلبها ، و ريان بقت كل ما تشوفني بتعاين لي بنظرة استحقار و شماته مع انها قبل كدا أصلاً ما كانت بتعاين لي ولا بتسلم علي طول فترة خصامنا! يوم انا طالعه ماشه المدرسه لاقيتها جايه من الدكان ، عاينت لي بإستحقار و قالت لي خلال اليوم دا حتسمعي خبر ما حيعجبك ، قلت ليها خبر شنو؟

قالت لي خليهو مفاجأه و مشت….فعلاً لمن رجعت من المدرسه شايفه ناس داخله و طالعه من بيت ناس ريان ، دخلت بيتنا و عرفت من أمي انو سامر خطب ريان ، أمي قالت لي بعد تفطوري امشي باركي ليها ….صحي انتي و ريان متشاكلات في شنو؟ قبيل إنصاف حكت لي الحصل لمن مشيتي بيتهم! و سألتني اذا عارفه سبب المشكله البيناتكم، قلت ليها والله ما عارفه و قدر ما اسألها بتقول لي موضوع بايخ و ما بترضى تقول لي ، تاني ح اسألك مالك مع ريان؟

قلت ليها ماف شي يا أمي و الموضوع ذاتو اتحلى ، قالت لي موضوع شنو؟

قلت ليها ياخ انا تعبانه يا أمي داخله ارتاح شويه ، المهم دخلت استحميت و صليت، بس اتذكرت كلام ريان قبيل معناها دي المفاجأه الكانت قاصداها ….ئهه شكلها لسه مفتكره انو في شي بيني و بين سامر عشان كدا قالت كلامها داك ، بس هي و سامر رجعوا لبعض كيف؟ لو سامر لقاها و اتكلم معاها أكيد حيقول ليها انو انا و هو ماف شي بيناتنا و الحصل كان سوء تفاهم بس حسب طريقة كلامها معاي و نظراتها لي القبيل هي لسه ما شالت فكرتها السيئه عني من بالها! ….عنها ما عندي بيها شغله….

بعد ما فطرت أمي قالت لي ماشه اشرب مع ناس إنصاف ديل الجبنه ، انتي ذاتك امشي معاي عشان تباري لـ ريان ، قلت ليها ما ماشه ياخ ، قالت لي مالك انتي؟ يومتا لمن قلت ليك امشي سماية رجاء قلتي ما ماشه و الليله اقول ليك امشي بارك لـ ريان تقولي ما ماشه؟

انتي الناس ديل مالك معاهم؟ عملوا ليك شنو؟ إنصاف دي كل يوم بتسألني منك ، قلت ليها و تسأل مني ليه! لو عايزاني خليها تجيني في البيت يعنى إلا امشي ليها في بيتهم؟

قالت لي حيرتيني معاك ، على كيفك ان شاء الله ذاتو تاني ما تطلعي من البيت دا…

________________________

بعد أيام إتلاقيت مع سامر في الميدان مع اني ما كنت ناوي اتكلم معاهو بس حصلت و اتكلمت، ناديت و مشينا بعيد قلت ليهو شوف يا سامر انا اللف و الدوران ما بنفع معاي ، علاقتك شنو بأختي؟

_ انا ذاتي اللف و الدوران ما بنفع معاي يا عامر ، فهمت سؤالك و أبشر ماف أي حاجه كدا ولا كدا بيني و بين أختك زي ما انا بخاف على أخواتي و مصلحتهم بتهمني كمان بخاف على بنات الناس مني ، انا زول دغري و جادي في حياتي عشان كدا كنت جاي اخطب عديل و لو علي ما بمانع لو بقى عقد ، طبيعي قبل ما اخطى خطوه لـ قدام اشوف رأي بت الناس أول ، اتكلمت مع ريان و قلت ليها بصراحه انا عايزها لقدام و كلمت أهلي و حنجيكم في البيت بس عايز اعرف اذا انتي موافقه ولا لا ، من كلامها عرفت انو ما عندها مانع، قبل ما نجيكم بيومين اتصلت علي و قالت لي ما تجونا في البيت و انا ما عايزا أي خطوبه تحصل بيني و بينك و حظرتني من غير ما تفهمني شي ، و ما عرفت كيف أوصل ليها، يعنى حتى لمن ألقاها في الشارع بكون عايز اتكلم معاها بس هي ما بتديني فرصه و بتكون خايفه زول يشوفنا مع اننا ما كنا بنعمل شي غلط يا عامر بس هي ما أدتني فرصه ، بعد الفتره دي كلها عرفت سبب سوء التفاهم الحصل و رسلت سمر اختي عشان توضح ليها الحصل و حالياً سوء التفاهم اتوضح ، و هسي قدامك عايز اقول ليك اني طالب يد أختك و ما عندي مانع اجيكم في البيت مع أهلي و نقابل أبوها…

رغم اني عارف بس سألتو سوء التفاهم كان شنو؟ قال لي موضوع هايف كدا خليك منو ، قلت ليهو بسبب مها؟

اتفاجأ لمن قلت ليهو كدا ما عرف يقول شنو فسكت لأنو فهم اني عارف ، قلت ليهو انت ليه اساساً ترسلها لـ ريان و ليه من الأول ما جيت اتكلمت معاي؟ كل يوم بنتلاقى في الميدان و انت ما قادر تتكلم معاي و بس بترسل في الناس؟

قال لي اقول ليك شنو يا عامر! ؟و بعدين ما كنت ح أجي اتقدم إلا ريان تقول لي انها موافقه! في الفتره ديك لو كنت جيت اتقدمت ليها أكيد كانت حترفضني لأنها فاهمه غلط و في سوء تفاهم حاصل! هسي ما حصل شي و انا طالب يدها اذا ما عندك مانع

سكته مسافه و فكرت كويس في الآخر هزيت ليهو براسي بمعنى كويس ، قال لي تمام بعد يومين حنكون معاكم، قلت ليهو بس خلي في بالك انو لو ريان رفضتك ماف زول حيغصبها! قال لي تمام…

لو ريان ما عندها مانع انا كمان ما عندي مانع بس دا ما السبب الوحيد الخلاني اوافق على سامر ، ما وافقت عشان ريان و بس وافقت عشان نفسي برضو ، فعلاً سامر جاب اهلوا و جوا قعدوا معانا و الحاج قال ما عندو مانع بس يسأل ريان و هي برضو ما مانعت و في اليوم داك عملوا الخطوبه ، كنت متوقع مها تجي بس جات أمها و هي لا، رغم الزعل و الضيق الجواي منها بس لسه مشتهي أشوفها يمكن لي اسبوع ما شفتها و ما لمحتها، عدم جيتها اثبت لي الكنت شاكي فيهو و للمره التانيه صابتني الخيبه 💔

تاني يوم لمن كنت طالع من البيت على شغلي هي كمان كانت طالعه ، ما كنت صدفه لي زمن واقف جنب الباب و منتظرها تطلع عشان أشوفها ، بس اول ما عيني وقعت في عينها اتذكرت العملتو و نظراتي ليها اتحولت لنظرات شماته لأنو سامر الكانت جاريه وراهو دا و البسبب عملتي مشكله بينو و بين ريان أمبارح هو خطب ريان ، و واضح انها كانت مضايقه من الحاجه دي و ضيقها دا خلاني اضايق ما قادر اتقبل فكرة انها بتحب سامر ، ما قدرت امسك نفسي فقلت ليها غريبه امبارح كانت خطوبة صحبتك و بت جيرانكم معقوله ما تجي تباركِ ليها؟

قالت لي و هي بتعاين في تلفونها امبارح كنت مصدعه و ما قدرت اجيها بس اليوم لو لقيت طريقه بجيها 😊

قالت كدا و كانت حتمشي بس وقفتها و قلت ليها خليني أوصلك معاي لأني اليوم ماشي نوباتيا و فعلاً انا كنت ماشي نوباتيا، كعادتها في البدايه رفضت بس في الآخر وافقت و ركبت معاي ، طول الطريق كانت بتعاين بالشباك و صاره وشها ، أول مره أشوفها منزعجه للدرجه دي ، من غير ما افكر قلت ليها امبارح ناس بيتنا كلهم كانوا بسألوا عنك أمك ، خاصة أمي ، قالت لي صح أمي كلمتني….قلت ليها بالمناسبه الخلاف البينك و بين ريان كان شنو؟

ما ردت علي ، كنت عايز بأي طريقه أجيب ليها سيرة سامر بس ما لقيت حاجه تخليني اذكر اسمو….

بعد مسافه طويله من السكوت ما قدرت امسك نفسي فما لقيت نفسي إلا و انا بقول ليها ليك حق ما تجي تباركِ لـ ريان!

إتلفتت على بإستغراب و قالت لي شنو؟ وقفت العربيه و قلت ليها زي ما سمعتي! قالت لي ما فاهمه قصدك انا؟

قلت ليها ما فاهمه ولا بتتغابي؟

قالت لي ما فاهمه شنو؟ و اتغابى ليه اصلاً؟

قلت ليها على فكره عندي علم بسبب الخلاف الكان بينك و بين ريان و عارف العملتيهو و عارف الغايه منو كانت شنو!

قالت لي بإستغراب طيب مدام انت عارف سألتني ليه و غاية شنو انت البتتكلم عنها دي؟

قلت ليها بنبره حاده و ضيق انا جني و جن الكذب و التمثيل ، عايزا تنكري انك ما كنتي جاريه ورا سامر عشان تعملي مشكله بينو و بين ريان؟

انتي قصداً ما جيتي لـ ريان عشان توضحي ليها سوء التفاهم لأنك اساساً ما عايزاهو يوضح ، و لما سامر قال ليك اتكلمي لي مع ريان و فهميها الحاصل ما رضيتي تتكلمي معاها بحجة انو في خلاف بيناتكم ، ما كنتي عايزا الخطوبه دي تتم بأي شكل من الأشكال لأسبب انتي أدرى بيها و يمكن لأنك عايزا سامر! عشان كدا رفضتيني! اااا اتذكرت لمن سامر طلب منك تتكلمي ليهو مع ريان و لمن حسيتي انو المياه حتجري في مجاريها بقيتي تمشي لـ سامر في بيتهم عشان تحاولي تعجبيهو و تغريهو

بقت تعاين لي بخلعه كدا و نظراتها دي فجأه اتحولت لغضب ، قالت لي من وين جبت الكلام دا؟ ماف أي شي من القلتو دا حصل

قلت ليها يا زوله! متين حتبطلي كذب و تمثيل ، لـ مره وحده خليك صريحه و اعترفي ما ح اعمل ليك حاجه انا

سكتت مسافه بعديها قالت لي اهااا يعني القصه و التلفيق دا كلو عشان رفضتك؟ صدق ما كنت عارفه انو انت الإتقدمت لي و رفضت من غير ما اعرف اسم الزول الإتقدم يومها زعلت شديد من استعجالي بس هسي بحمد الله على رفضي ليك، الحمدلله اني ما عرفت انك انت المتقدم لي ، تفكيرك الوسخ و المقرف دا احتفظ بيهو لـ نفسك ، قلت ليها ح احتفظ بيهو بس انتي اعترفي 😊

قالت لي بإنفعال اعترف بشنو؟

قلت ليها مها بطلي البتعملي فيهو دا و اعترفي ، قالت لي ما ح اعترف بحاجه انا ما عملتها و طوالي شالت شنطتها و نزلت و كانت حتمشي بس وقفتها و قلت ليها ارجعي اركبي! ما اشتغلت بي و واصلت طريقها، تاني لحقتها و قلت ليها بنبره حادي اركبي خلينا نتفاهم برواق ما فتحت معاك الموضوع عشان تنزلي و تمشي و عموماً عرفت الكنت عايز اعرفو و هسي ح نقفل الموضوع دا عشان كدا تعالي و خليني أوصلك ، قالت لي لا و طوالي مشت و أول حافله جات جنبها ركبت و خلتني واقف في الشارع بعاين ليها، اضايقت شديد و ما عارف ضيقي دا منها هي و لا من نفسي لأني ضايقتها و زعلتها! مسحت وشي بيديني و رجعت ركبت و اتحركت….

من يومها اختفت من حياة و المره دي بالغلط ساي بقيت ما بلمحها يمكن قريب الشهر انا ما شفتها تاني مع اننا فاتحين قصاد بعض كأنها بتحاول تعاقبني ببعادها عني ، و محاولتها دي نجحت، بقيت زي الزول الرايحه ليهو حاجه، بقيت ما بعرف يميني من شمالي و دايماً سارح بعيد كأنو. في حاجه ناقصاني …..و فعلاً ناقصني وجودها في حياتي، في الشهر دا سامر قال ما عايز فترة الخطوبه دي تطول و اقترح على أبوي يعقد طوالي عشان هو جاهز و فعلاً كل حاجه كانت جاهزه و الترتيبات كلها اتعملت ، في كل الحفلات العملناها قبل العرس هي ما جات ، اتوقعت انها تجي يوم حفلة الحنه حقت ريان بس هي ما جات ، في يوم العقد بالصباح كنت مشغول مع الناس و طالع و داخل عشان اشوف اذا في حاجه ناقصه، بالصدفه سمعت أمي سألت أمها عنها، فقالت ليها انها عيانه بس حتجي بعد شويه ، فرحت شديد لمن عرفت انها حتجي مشيت خلصت شغلي سريع و جيت وقفت جنب الباب، انتظرت و انتظرت بس ما لمحتها جايه و زمن العقد قرب، دخلت استحميت و جهزت نفسي للصلاة ، وقفت انتظرتها للمره التانيه بس ما جات في الآخر استسلمت و مشيت معاي ناس أبوي للصلاة و العقد ، بعد ما العقد تم و جينا راجعين من المسجد و بعد موالات التبريكات و الزغاريد، بقيت افتش عليها قلت أكيد حتكون جات بعد دا ، دخلت جوه و فتشتها كتير بس ما لقيتها ، اضايقت منها شديد و قلت معقوله دا كلو زعل عشان سامر حيعرس؟ و بسبب دا هي مرضت؟ معقوله صعب عليها تشوف سامر حيعرس! للدرجه دي الموضوع فرق معاها و أثر فيها؟!

المسا عملنا الترتيبات و جهزنا الباصات الحتودي الناس للصاله ، عشان الناس كانت كتيره اضطرينا نجيب باصات ، لحدي آخر لحظه كنت متوقع اني أشوفها بس كالعاده خيبة ظني و ما جات 💔

بس لمن وصلنا الصاله ، و بعد ما فقدت الأمل في جيتها لمحتها من بعيد جايه داخله مع سراج و أمها، ما ح اقدر أوصف كمية الفرحه و السعاده الإتكونت جواي، بقيت اعاين ليها كأني بحاول اتأكد انو دي هي! ما عارف هل كانت حلوه شديد ولا انا عشان مشتاق لشوفتها شفتها كدا!؟

كانت زايده حلاوه و الفستان الابساهو حلاها زياده! لا هي الخلتو يبقى حلو 💜

————————————–

———————

*☆يتبــــــــــــــــــــــــــــــــــــــــــــع☆☆*

*بــــــــــــــيــــــــــــــــــــجــــــــــــــة*

اضغط هنا للانضمام لقروبات الواتس آب